اللقاء الثانى من سلسله لقاءات (التخليه قبل التحليه) يالا نستعد لرمضان
جروب جدد حياتك
احنا المفروض اننا بنتناول فى مجموعه اللقاءات دى فكره التخليه قبل التحليه
وايه الحاجات اللى بتأخرنا عن الطاعه وبتشدنا لورا
علشان نتركها
فلقيت ان من اهم الحاجات دى هى (الكسل عن القيام بالطاعات)
اننا نكون كويسين وحلوين وكل حاجه و عندنا وقت فاضى
بس مكسليين
تعالو نشوف ايه هوه الكسل وايه اسبابه وطرق علاجه وازاى نقيسه
يالا
بدايتا معنى الكسل في الطاعات
الكسل : هو التثاقل عما لا ينبغى التقاقل عنه من امور الدين
يعنى انك تكونى قادره انك تعملى حاجه بس مكسله
انواع الكسل انا قسمتها 3
النوع الاول هوه كسل عقلى
انك اصلا مبتفكريش تعملى حاجه جديده لدينك او لاخرتك
النوع التانى كسل بدنى
اللى هوه لاء دا انا احسن واحده افكر بس تنفيذ مفيش
النوع الثالث هوه الكسل عن اكتمال الفكره
يعنى انا فكرت اعمل جمع تبرعات مثلا
وفعلا اعلنت عنها
بس ملمتش كتير اقوم ارجع لكل واحد فلوسه واقول خلاص موش مكمل
يعنى زى ما انا ادخل دلوقتى ملقاش غير اتنين 3 اللى موجودين اقول طب خلاص موش هدى اللقاء لاء طبعا ده موش صح
طب ايه الدليل من السنه ان الكسل ده مرض مكروه ومزموم
قال رسول الله صلى الله عليه وسلم ( اللهم انى اعوز بك من العجز والكسل ) صدق رسول الله صلى الله عليه وسلم
الرسول صلى الله عليه وسلم بيستعيذ من الكسل
كده اتعرفنا على معنى الكسل وانواعه
طب ايه اسبابه
ايه الحاجات اللى ممكن تكون سبب فى ظهور الكسل عندنا الكسل عن الطاعات طبعا
1- النفاق
اول حاجه النفاق انك تكون بتظهر بنشاط قدام الناس بس لو الناس موش موجوده تكسل
وتسيب نفسك للكسل ده
2-الفراغ
طبعا هتقولوا يا سلام بدأتى بقى تخرفى
بقى الفراغ هيكون من ضمن اسباب الكسل عن الطاعات
الاجابه اه
ممكن من كتر ما عندك فراغ تفضلى تأجلى فى الطاعه لحد الوقت ما يعدى
وممكن العكس ممكن فى عز ما انتى مشغوله تقدرى تنظمى طاعاتك كويس جدا
انا منى واحده مبضعش منى الاذكار غير يوم اجازتى
لانى مظبطه نفسى اقولها وانا راجعه من الشغل
يوم ما اغيب ضاعت
لانى كل شويه اه هقولها اه هقولها لحد اليوم ما يعدى
3- صحبه اهل الكسل او الجلوس مع زوى الكسل
ودى فعلا بتحصل
يا جماعه احنا متجمعين اهوه تيجو نعمل مقرأه يقولولك اه ماشى بس شوفتى فلانه اطلقت متعرفوش ليه وتلاقى الوقت راح فى قصه تانيه خالص
وبدل المقرأه دخلنا فى الغيبه والنميمه
وكله كوم بقى ويالا نصلى جماعه دى كوم
تلاقى اللى يقولك ماشى بس ثوانى المسلسل يخلص
واللى تقولك بس احمر الرز بسرعه كده واحصلكو
وهكذا
4- احساسك بأن الحاجه القليله اللى بتعملها دى كتير اوى
يعنى قومت فى ليله برد واتوضيت وصليت ركعتين
تحس انك يا سلام عملت اللى محدش عمله
ولا صومت يوم حر انت كده خلاص
اه انت عملت حاجه كويسه بس موش اللى متعملش يعنى
فين ناس صوامين قوامين
وفى ناس بتقيم كل ليله
5- البيئه المحيطه
كتير اوى بتكون البيئه المحيطه سبب اساسى فى تكاسلنا عن الطاعات
يعنى انتى لو فى بيت كله بيصلى الفجر استحاله هيفوتك ولا فجر
صح
6-ورقم 6 دى مهمه شويه يعنى
علشان فى الاول الكل هيهجمنى فيها
انا كل الكلام ده بكتبه من عندى ومن خلال تجربى وكلامى مع الناس
انا شايفه ان من ضمن اسباب الكسل عن الطاعات
رضا الزوج
اغلبيه الستات بتكسل عن كتير من الطاعات بحجه رضا الزوج
انتى موش بتصلى الفجر ليه يا اختى
تقولك يعنى هسيب جوزى نايم واقوم انا من جنبه
يا سلام
او تقولك مهو انا لازم اخرج معاه على سنجه عشره
اصله بيحبنى فى البدل
علشان كده بلبسها
لاء يا اختى
لا طاعه لمخلوق فى معصيه الخالق
وهوه لو زوج صالح لو صحى من النوم لقاكى ساجده على المصليه
هيفرح ويقول الحمد الله اللى رزقنى زوجه صالحه
اه عايزه بس اقول تعليق على اللى فاتت
يعنى موش تخلى جوزك قاعد بره فى الصاله وانتى قاعده 3 ساعات تصلى قيام ليل
لاء ده مينفعش
لقد جعلناكم امه وسطا
يعنىى يا جماعه وسطنوا العمليه
7- رقم 7 دى مهمه وتمس القلب اوى
لو عندك كسل فى الطاعه اعرف انك موصلتش لكمال الحب لله
متتعصبوش ليا هقنعكو برأى
انتى دلوقتى لو بتحبى ماده معينه موش هتلاقى نفسك كل ما تزكرى تزكرى الماده دى
متمسكيش غيرها
الى بيحب حد بيجى على نفسه عشان الى بيحبه حتى لو الى يرضيه صعب عليه حيعمله من غير ما يحس
اه انا جمعت بعض اسباب الكسل
يمكن فى تانى بس ده اللى قدر عقلى يجيبه
نقلهم نقط سريعه
1-النفاق
2- الفراغ
3-صحبه اهل الكسل
4-احساسك بان العباده اللى بتعملها كبيره على الرغم من بسطتها
5- البيئه المحيطه
6- رضا الزوج
7- عدم الوصل لكمال الحب لله عز وجل
ماشى
ندخل فى العلاج
احنا هنتكلم فى كل حلقه على عائق من عوائق الطاعه
وديما هيكون او كبسوله سريعه للعلاج هوه كثره الاستغفار وذكر الله
ديما ده هتلقوه رقم واحد كل مره
لانه بيفكرنى ببرشام ريفوا كده فكرينوا تحس انه لكل حاجه
ده بنادول اكسترا بتاع حياتنا
يبقى رقم
1- الاستغفار ومنها طبعا استغفار ما بعد الصلاه اللى بنكسل عنه لو فى موضوع هنرغى فيه
2-انك تفهمى كويس اوى ان الايمان بدون عمل ايمان ناقص
كتير عندنا فى القران الكريم الايمان مقترن بالعمل
(اللذين امنوا وعملوا الصالحات )
ديما ايمان بس مينفعش
لازم تعملى اللى بيدل على ده
مينفعش افضل اقول انا بحب الله ورسوله , انا بحب الله ورسوله
وانتى مبتعمليش ولا سنه من سننه
زى ما انتى بتقولى لحد لو بتحبنى اثبتلى
موش احنا ديما بنقول كده
الحب موش كلام بس
كلام وفعل
احنا لو واحده جت قالت فلان بيحبنى هنقولها طب يجى يخطبك هتقول قولتله قالى لاء انا بحبك بس
هنقولها ايه لاء يا ماما ده بتاع كلام ده مبيحبكيش
احنا بردو كده لو بنحب الله ورسوله هنعمل اللى يرضيهم وموش هنكسل وندى فرصه للشيطان يضحك علينا
3-النيه والهمه
صدقينى لو اخلصتى النيه بجد والله الله المستعان بأذن الله
وشرط النيه انى اعمل بيها
يعنى انا نويت اصلى الفجر
موش اقول ان شاء الله هصلى الفجر وشكرا خلاص على كده
لو صحيت بقى ابقى اصلى
انتى نويتى بس معملتيش اللى يدل على كده
علشان تصلى الفجر تظبوطى موبيلك وتتفقى مع صاحبتك ترن عليكى وتنامى بدرى
كده انتى عملتى بنيتك لو كل الظروف دى منجحتش ومصلتيش بعدها الفجر بردو تأكدى انك هتخدى الثواب بأذن الله
4- ديما فكرى فى الثواب اللى هتخديه لو عملتى الطاعه دى
زى مثلا صلاه الفجر قولى الله ده ركعتى الفجر خيرا من الدنيا وما فيها قال رسول الله صلى الله عليه وسلم: ( إن أثقل صلاة على المنافقين، صلاة العشاء وصلاة الفجر،ولو يعلمون مافيها لأتوهما ولو حبوآ،ولقد هممت أن آمر بالصلاة فتقام،ثم آمر رجلا فيصلى بالناس،ثم أنطلق معي برجال معهم حزب من حطب،إلى قوم لايشهدون الصلاة،فأحرق عليهم بيوتهم بالنار).
5 -الصحبه الصالحه
قال رسول الله صلى الله عليه وسلم(المرء على دين خليله فلينظر احدكم من يخالل)
6-التحضير للطاعه
يعنى مقولش انا عايز اواظب على الاذكار
لاء دور على ورقه من ورق الاذكار ومظونش فى بيت يخلو منها
وخليها معاكى
هاتى ادعيه الصلاه واكتبيها فى ورقه واقرأيها بعد كل صلاه
7-الثواب والعقاب للنفس
انك تتعامل مع نفسك وكأنها طفل بتريد تأديبه وتربيه وتهذيبه
ازاى
والله نفسنا موش وحشه اوى
هى بس عايزه سياسه خاصه
عملى نفسك وكأنك بتربيها
لو غلطت تتعاقب
لو اتفقتى معاها على حاجه ومعملتهاش تتعاقب وتتحرم من حاجه بتحبها
ولو عملت حاجه كويسه او ساعدتك على طاعه اعمللها جايزه
والله لو عملتو النفس كطفل محتاجه تربيه هترتاحى
بس اوعى تنوى تعقبيها وبعدين ترجعى فى كلامك
زى الطفل اللى لو اتعود على انك بترجعى فى كلامك خلاص ولا هتفرقى معاه
نكمل
اتفقنا يا جماعه على تأديب النفس
ممكن يعمل عشان ميتحرمش من الحاجه ديه مش عشان الى بيعمله غلط
ماشى معاكى وبعد كده هتتعود والعباده مع الوقت هتصبح عاده
زى الطفل الصغير لما بنعلموا يصلى
انا ابن اخويا 4 سنين
كل ما كان بيصلى جنبى اديله حاجه حلوه
وكان بعد الصلاه يقولى فين بقى
الكلام ده من رمضان اللى فات
دلوقتى بيجى يفرش المصليه ويصلى جنبى وولا بيسأل على حاجه حلوه ولا بتاع
خلاص دى بقت اساسى عنده
فهمتينى
8- الضمير الله يباركلكوا
انت فى العباده مفيش اى رقيب عليك
غير ربنا
الضمير يعنى ايه
يعنى افهمى ان ربنا فى غنى عن الركعتين بتوعك دول
لو معملتهومش بحب
وبضمير
الضمير يعنى اسباغ الوضوء
وطبعا نشوه شرحته امبارح
واسباغ الوضوء بأختصار هوه انك تتوضه بضمير
تتدى كل جزء حقه فى الوضوء
طيب ممكن باوقات اعملهم بضمير بس بحس انو غصب عني لاني بكون نعسانة او مريضة؟؟؟؟؟
الدنيا موش هطير ولا الثوانى البسيطه دى هتفرق حاجه
لو مرض معاكى عزرك
لكن لو كسل لاء
مهى دى المكاره
مهو الحديث بيقولك اسباغ الوضوء على المكاره
يعنى وانت تعبان او نعسان
لازم مجاهدة النفس
9 محاسبه النفس اول بأول
الله يجزيكم خير متأجلوش الحساب علشان لما الوقت بيبعد بننسى
يعنى كل يوم اعمل خطه للعباده وبليل حاسب نفسك واللى ناقص لسه معملتوش قوم اعمله قبل ما تنام
احنا اعملنا بترفع الى الله مرتين فى الاسبوع
مع ان ربنا عز وجل ممكن يرفعها مره واحده فى العمر
صح
بس لاء حاسب نفسك اول بأول وسدد اللى عليك
انا هستغفر 100 مره جه الليل ولقتنى نسيت
على طول قبل ما انام اكون مستغفر
ال100 اللى عليا
10- فهم الفاظ الدعاء
والتأمل فيها
علشان نحس بحلاوه العباده ومتبقاش مجرد تأديه واجب
وبعد شويه نكسل عنها خالص
ياريت منبقاش بنقول ادعيه حفظنها وخلاص
11- افهم الشيطان كويس
وعلى فكره الشيطان لا لئيم ولا حاجه
ووالله مفقوس جدا
سمعت اذان الفجر جيت تقوم لقيت حاجه بتقولك يا عم نام والصبح صلى تفتكر يعنى مين بيقولك كده
بوجى وطمطم
اكيد طبعا الشيطان
جىه تقرأى قران لقيتى هاتف كده بيقولك بس النهارده العرض الاول للفيلم
يعنى السبكى اللى بيقولك كده
هههههههههههههه
اكيد الشيطان
احنا بقى عايزين نغيظو
ماشى
بجد يا بنات والله
خودى ديما كل حاجه معاه عند
"ان كيد الشيطان كان ضعيفا"
انت عايز كده طب انا بقى هعمل كده
ضعيف جدا
انتى عارفه لو قاعده تسمعى فيلم هتلاقى نفسك مصحصحه وزى الفل لو بدأتى تقرأى قران هتلاقى نفسك بتنامى اصله لقى مفيش فايده صحيانك جى عليه بخساره فهينيمك
ودى نصحتى للناس اللى عايزه تنام بدرى
علشان هو هيجي خطوة خطوة
بس لازم نحذر من خطوات الشيطان
اللى عايز ينام يقعد يقرأ قران
موش شويه ويقوم لاء يقرأ لحد ما ينام
يبقى عند مع الشيطان اعرفى ان كل اللى مضيعك كده هوه الشيطان
اخر حاجه فى العلاج
12- استحضار وتععد النوايا
حاول انك ديما تعددى النوايا فى العباده اللى هتعمليها
علشان تحثى بكثره الثواب فتتشجعى على عميلها
يبقى كده احنا قولنا اسباب الكسل عن الطاعه وعلاجه طبعا ده اللى جه فى بالى اكيد انتو عندكو ا
يعني لو مثلا عايزه انااام ححط نية اني انام حتى اتقوى على عبادة الله وبالتالي حاخد اجر عليها
وهي بالاصل اناعايزه انام حتى ارتاح
بس ناقص نقطه واحده وهى ازاى اقييس كسلى
ازاى تقييس مدى كسلك
تقيس انت كسلان ولا لاء بأمرين
انك تحط هدف قريب وهدف بعيد
الهدف القريب اللى هوه اناا هعمل النهارده العباده كذا وكذا وكذا وبعرفها فى محاسبه النفس اللى قولنا عليها
طب المدى البعيد بقى
انى وانا بحط هدف قريب احط كمان هدف بعيد
ازاى
اقول انى هبدأ استغفر كل يوم 100 مره مثلا وكل يوم هزود على ال100
عشره
يبقى المفروض انى بعد عشره ايام القينى بستغفر 200 مره
مظبوط
لو لقيتى نفسك وصلتى للهدف البعيد فى الوقت اللى انتى محدداه اعرفى انك معندكيش مرض الكسل فى الطاعه
ولكن لو لقيتى نفسك موصلتيش اعرفى ان فى عندك كسل لازم تشوفيه من ايه
طبعا انا بدى مثال بس لكن ده ممكن يقاس عليه قرأه القران او حفظه او الصوم اى عباده عموما
بس ياريت يا جماعه متشقوش على نفسكو بأهداف كبيره
علشان ميحصلش احباط
اخر نقطه عاوزه اشير ليها
خاف اوى اوى
لو انت بتشد فى الطاعه لما تكون عايز حاجه من ربنا
ده موش مكروه لان احنا امرنا اننا لو احتجنا المطر نصلى
بس متبقاش بتاع مصلحتك
ووصيه اصيكم بيها واوصى نفسى بها
لما تفتكر حاجه كان نفسك فيها وربنا حققهالك قوم صلى ركعتين شكر لله على الحاجه دى
الحاجه دى بالاخص
الى اللقاء والتقى بكم في اللقاء الثالت من سلسه (التحليه قبل التحليه )
هبه عقباوى 
